因傷缺陣今季大部分賽事嘅利物浦前鋒阿歷山大伊沙克出戰世盃大翻身，射入1球及2次助攻，喺周一(15日)早上F組賽事，協助瑞典以5比1大勝非洲球隊突尼西亞。拍檔約基利斯同樣入波及助攻，瑞典呢對「英超神鋒」組合威力強大。
由英格蘭名帥樸達執教嘅瑞典，擺出英超「雙神鋒」約基利斯、阿歷山大伊沙克攻堅，一開波就採取主動，約基利斯左路快放，扣入大位勁射高出。跟住中堅域陀連迪路夫長傳入禁區，突尼西亞門將查馬卡出迎打手槌不遠，約基利斯射空門，即使被對方球員解圍，中場耶辛艾耶利仍然把握機會遠射入網。
戰至29分鐘，瑞典破壞對手攻勢，立即快速反擊，約基利斯二傳，阿歷山大伊沙克左路單刀長驅直進，推向大位射入成2比0。身價達1.25億鎊(約13億港元)嘅伊沙克今季為紅軍上陣22場僅入4球，但返回國家隊後愈戰愈勇，繼日前熱身賽對挪威入波後，今仗又有進帳。
臨完上半場，突尼西亞追番1球，米積伯利右路傳中，奧馬列卻克頂入成1比2。換邊之後，阿歷山大伊沙克繼續有出色表現，59分鐘搶到波，傳畀約基利斯射成3比1，換言之，呢2位英超神鋒今仗同樣入波及助攻，盡顯身價。
84分鐘，阿歷山大伊沙克後腳傳畀史雲貝治入波，加上耶辛艾耶利補時遠射入網，個人梅開二度，協助瑞典大勝5比1。由於同組荷蘭對日本打和2比2，瑞典贏波之後佔據榜首。
免費玩Game、砌最強11人，一鍵share畀FD子打牙骹：
阿歷山大伊沙克(右)射入1球及2次助攻。